ವಿಶ್ರಾಂತಿ 
ನಾನು ನನ್ನೊಳಗಿಲ್ಲ ನಿನ್ನೊಳಗೂ ಇಲ್ಲ
ಕಳೆದೇ ಹೋಗಿಹೆ ಇಹದ ಪರಿವೆಯಿಲ್ಲದೆ ಎಲ್ಲೋ 
ಎಲ್ಲವೂ ಖಾಲಿ ಖಾಲಿಯೀಗ ನಡೆದಷ್ಟೂ ದೂರ ಬಟ್ಟಾ ಬಯಲು 
ನೆಟ್ಟಿಹುದು ನೋಟವೀಗ ಶೂನ್ಯದಲ್ಲಿ 

ಹುಡುಕಿ ಪಡೆವುದೇನಿದೆ ಇನ್ನು 
ಅದೇ ಸಿಮಿತದ ವೃತ್ತದಲ್ಲಿ 
ಅರಿತ ಮನ ಕಾತರಿಸದಿನ್ನು ಜಡವಾಗಿದೆ 
ಬೆಳೆದ ಹಸಿರು ಹುಲ್ಲಾಗಿದೆ ಮರಳು ಬಿಸಿಲಿನಲ್ಲಿ 

ಕಂಡೆ ದೂರದಲಿ ನೀರೆಂಬ ಆಸೆ
ಹತ್ತಿರದಿ ಕೈಯ್ಯೊಡ್ಡುವಾಗ
ಮರಳುಗಾಡಿನ ಬಿಸಿಲ್ಗುದುರೆ
ಮನ ಮೋಸ ಮಾಡಿತ್ತು ಭ್ರಮೆಯ ರೂಪದಲಿ

ಮುಸ್ಸಂಜೆ ಬಂದಾಯ್ತು
ಬೆಳಕಿಗಿಂತ ಕತ್ತಲೆಗೇ ಹತ್ತಿರ
ಅಲೆದು ದಣಿದಿದೆ ಜೀವ ನಿಟ್ಟುಸಿರಿಟ್ಟು
ಬಯಸಿ ಅಪ್ಪುತಿದೆ ವಿಶ್ರಾಂತಿಯನ್ನು..

ಸ್ನೇಹ ..

ನೀ ಕರೆದಾಗೆಲ್ಲ ಓ ಎಂದು ಮುದ್ದಿಸಿ ರಮಿಸಲು ನಾ ನಿನ್ನ ಹೆಂಡತಿಯಲ್ಲ 
ನಿನ್ನ ಬೈಗುಳವ ತಿಂದು,ತಪ್ಪನೆಲ್ಲ ಒಡಲಲ್ಲಿಟ್ಟು ನಗಲು ನಾ ನಿನ್ನ ತಾಯಿಯಲ್ಲ 
ನಿನ್ನ ಕನಸಿಗೆ ಲಗ್ಗೆ ಇಟ್ಟು ನಿದಿರೆಯ ಕದ್ದೊಯ್ಯಲು ನಾ ನಿನ್ನ ಪ್ರೇಮಿಯಲ್ಲ 
ನಿನ್ನ ಸುಖದಲಿ ನಕ್ಕು ಕಷ್ಟದಲಿ ಕಣ್ಣೀರೊರೆಸಿ ಶುಭವನ್ನೇ ಹಾರೈಸುವ ನಾ ನಿನ್ನ ಸ್ನೇಹಿತೆ ......